ललितपुरको इमाडोलबाट विवादास्पद धर्मगुरु पुष्कर खतिवडा पक्राउ परेका छन् । प्रहरीले विशेष अपरेशनमार्फत उनलाई नियन्त्रणमा लिएको हो ।
शुक्रबार काठमाडौंको तीनकुनेमा राजावादी आन्दोलन हिंसात्मक बन्दा धर्मगुरु खतिवडाले ढुंगा हानेर मात्र नभई अरूलाई पनि त्यही गर्न उक्साएको प्रहरीको दाबी छ । उनीमाथि शान्ति सुरक्षाविरुद्धको गतिविधिमा संलग्न भएको आरोप लागेको छ ।
यसअघि, सोही घटनासँग सम्बन्धित भएर राप्रपाका वरिष्ठ उपाध्यक्ष रविन्द्र मिश्रसहितका नेताहरूलाई पनि प्रहरीले पक्राउ गरिसकेको छ ।
काठमाडौं प्रहरी परिसरका प्रवक्ता अपिलराज बोहोराका अनुसार शुक्रबार रातिसम्म पक्राउ पर्नेको संख्या ५१ पुगेको छ। प्रहरी स्रोतका अनुसार थप अनुसन्धान जारी रहेको छ ।
तपाईको प्रतिक्रिया दिनुहोस