साउदी अरबको अलकसिम क्षेत्रका ४० जना नेपाली श्रमिक अलपत्र परेको खबर आएको छ। नेपालबाट सगरमाथा म्यानपावर, यात्रा एचआर, र ओम ओभरसिज मार्फत साउदी पठाइएका यी श्रमिकहरू दुई महिनादेखि दुई वर्षसम्मको अवधिमा साउदी पुगेका थिए, तर उनीहरूलाई काम र खाना दुवैबाट वञ्चित गरिँदै आएको छ।

चार महिना अघि साउदी पुगेका श्रमिक जितेन्द्रकुमार महराका अनुसार उनले अहिलेसम्म मात्र ६ सय रियाल तलब पाएका छन्। "चार महिनामा तीन महिनाको तलब दिएको छैन, परिचयपत्रको म्याद सकिन लागेको छ, तलब माग्दा कम्पनीले हामी जिम्मेवार छैनौं भन्छ," उनले बताए।

यी श्रमिकहरू अलहदवा र अलसुल्तान सप्लाई कम्पनीमा कार्यरत थिए, तर उनीहरूको परिचयपत्र (अकामा) नवीकरण नभएकाले रोजगारदाता कम्पनीहरूले कामबाट निकालिदिएका छन्। उनीहरूलाई अलकसिममा राखिएको छ र सप्लाई कम्पनीले कुनै सहुलियत दिएको छैन।

नेपाली दूतावासका प्रतिनिधि विशाल श्रेष्ठले पीडित श्रमिकहरूसँग भेटेर २० जनालाई नेपाल फर्काउन प्रक्रिया अघि बढाएको जानकारी दिए। दुई जना श्रमिकलाई बिहीबार नेपाल पठाइएको छ।

दुई महिना अघि सगरमाथा म्यानपावरलाई दुई लाख ८० हजार रुपैयाँ तिरेर आएका श्रमिकले काम नपाएको र खाना समेत नदिएको बताए। "काम पनि छैन, पैसा पनि छैन, र घर फर्कन समेत दिएन," उनले दुखेसो पोखेका छन्।

नेपाली दूतावास र एनआरएनए आरसीसी अलकासिमका प्रवक्ता अली अर्सिनले पीडितहरूको उद्धारका लागि समन्वय भइरहेको जनाएका छन्।