गण्डकी प्रदेशमा पछिल्ला ९ महिनामा ९ हजारभन्दा बढी डेंगीका बिरामी थपिएका छन्। प्रदेश स्वास्थ्य मन्त्री कृष्ण पाठकले प्रदेशसभामा प्रस्तुत गरेको विवरण अनुसार पुसदेखि हालसम्म ९ हजार ९४ जनामा डेंगी पुष्टि भएको छ।

सबैभन्दा बढी संक्रमित कास्की जिल्लामा ४ हजार ५५२ जना छन्। तनहुँमा २ हजार ३४७, पर्वतमा ८१६, गोरखामा ४१०, स्याङ्जामा ३३०, बागलुङमा ३१८, म्याग्दीमा ११७, नवलपुरमा १०५, लमजुङमा ९४ र मुस्ताङमा ३ जना संक्रमित छन्। मनाङमा भने हालसम्म कुनै बिरामी भेटिएको छैन।

पालिका स्तरमा सबैभन्दा बढी बिरामी पोखरामा देखिएका छन्, जहाँ ४ हजार ४३३ संक्रमित छन्। अन्य उच्च प्रभावित क्षेत्रहरूमा आँबुखैरेनी, कुश्मा, व्यास, गोरखा, शुक्लागण्डकी र बेनी छन्।

हालसम्म गण्डकी प्रदेशमा डेंगीका कारण ६ जनाको मृत्यु भएको छ। पहिलो मृत्यु साउन १० गते तनहुँमा ४५ वर्षीय पुरुषको भएको थियो, भने पछिल्लो मृत्यु असोज २ गते स्याङ्जामा ७० वर्षीया महिलाको भएको हो।

डेंगी नियन्त्रणका लागि प्रदेश सरकारले लार्भा नष्ट गर्ने अभियान र अभिमुखीकरण कार्यक्रम सञ्चालन गरिरहेको छ। सरकारी अस्पतालहरूमा निःशुल्क परीक्षण र उपचार भइरहेको छ भने निजी अस्पतालहरूमा परीक्षण शुल्क ६ सय रुपैयाँ तोकिएको छ।

स्वास्थ्य मन्त्री पाठकका अनुसार, डेंगी रोकथामका लागि थप स्रोतसाधनको आवश्यकता परेको छ। प्रदेश सरकारले डेंगी नियन्त्रणको लागि कार्ययोजना तयार गरी लार्भा खोज र नष्ट गर्ने अभियानलाई तीव्र बनाएको छ।