स्लोभाक सरकारले बुधबार मानिसहरूलाई खतरा उत्पन्न भएको भन्दै तीन सय ५० भालुलाई गोली हानेर मार्न अनुमति दिएको छ । यस कदमलाई संरक्षणवादीहरूले गैरकानूनी भन्दै आलोचना गरेका छन् ।

मध्य स्लोभाकियामा सम्भवतः आइतबार भालुले मारेको मानिसको अवशेष फेला पार्नुका साथै मानिसमाथि धेरै भालुले आक्रमण गरेपछि यो निर्णय आएको हो ।

“हामी यस्तो देशमा बस्न सक्दैनौँ जहाँ मानिसहरू जङ्गलमा जान डराउँछन्”, प्रधानमन्त्री रोबर्ट फिकोले पत्रकारहरूलाई भन्नुभयो । फिकोको सरकारले पनि ‘अवाञ्छनीय’ भालु उपस्थितिका कारण अधिकांश स्लोभाक जिल्लामा आपत्कालीन अवस्था घोषणा गरेको छ ।

स्लोभाक संसद्ले पहिले नै सन् २०२४ मे महिनामा भालु मार्ने नियमहरू खुकुलो पारेको थियो । ती नियमले धेरै जिल्लामा प्रतिबन्धबाट छुट दिन अनुमति दिएको छ ।

तर देशले युरोपेली सङ्घ (इयु) को निर्देशनको पालना गर्नुपर्छ । निर्देशनले कुनै अन्य समाधान नभएको अवस्थामा मात्र सम्पत्तिमा क्षति पुर्‍याउने वा मानिसहरूलाई आक्रमण गर्ने समस्याग्रस्त भालुहरू मात्र मार्न अनुमति दिन्छ ।

सन् २०२४ मा ५४ लाख जनसङ्ख्या भएको युरोपेली सङ्घ (इयु) को सदस्य मुलुक स्लोभाकियामा ९३ वटा भालु गोली हानेर मारिएको र ३६ वटाको कार दुर्घटनामा मृत्यु भएको दैनिक डेनिक एनले बताएको थियो ।

यद्यपि जान कुचियाक इन्भेस्टिगेटिभ सेन्टरका पत्रकारहरूले सन् २०२४ देखि ५० वटा घटनाको अध्ययनका आधारमा सिकारीहरूले सम्भवतः मानिसहरूमाथि आक्रमण गरेका भालुहरूलाई कहिल्यै नमारेको बताएका छन् ।

पर्यावरणमन्त्री टोमस ताराबाले बुधबार स्लोभाकियामा एक हजार तीन सयभन्दा बढी भालु रहेको र जनसङ्ख्या बढ्दै जाँदा आठ सय ‘पर्याप्त सङ्ख्या’ भएको बताए ।

तर बुधबारको निर्णयले अन्तर्राष्ट्रिय दायित्वको उल्लङ्घन गरेको र वातावरण मन्त्रालयले जानाजानी कानून उल्लङ्घन गरेको भन्दै संरक्षणवादीहरूले सरकारको आलोचना गरेका छन् ।

संरक्षणवादीहरूले मन्त्रालयलाई बरु मानिसहरूलाई प्रकृतिमा कसरी सुरक्षित रहने भनेर सिकाउन आह्वान गरे । “अप्रभावकारी समाधानहरूको सट्टा हामीले रोकथामलाई सुदृढ गर्न आवश्यक छ – शिक्षा, फोहोर हटाउने व्यवस्था, सिकारलाई आकर्षित गर्ने नियमन वा प्रकृतिमा सुरक्षित आवागमन बारे जनतालाई सूचित गर्ने”, एभिस फाउन्डेसनले फेसबुकमा भनेको छ ।