युरोपमा सन् २०२४ मा दादुरा (Measles) का बिरामीको संख्या दोब्बर वृद्धि भएको छ । विश्व स्वास्थ्य सङ्गठन (डब्लुएचओ) ले बिहीबार सार्वजनिक गरेको तथ्याङ्क अनुसार यो संख्या २५ वर्षयताकै उच्च हो । सङ्गठनले संक्रमण रोकथामका लागि खोप अभियानलाई तत्काल र प्रभावकारी ढंगले अगाडि बढाउन आग्रह गरेको छ ।

डब्लुएचओका अनुसार सन् २०२३ मा युरोपेली क्षेत्रमा दादुराका एक लाख २७ हजार ३५० जना संक्रमित फेला परेका थिए, जसमा ३८ जनाको मृत्यु भएको थियो । डब्लुएचओले मध्य एसियासहित युरोपको ५३ देशलाई युरोपेली क्षेत्र अन्तर्गत राखेको छ।

दादुराका सबैभन्दा धेरै संक्रमित देशहरूमा रोमानिया (३०,६९२ जना) र कजाखस्तान (२८,१४७ जना) रहेका छन् । संक्रमण भएका मध्ये आधाभन्दा बढीलाई अस्पताल भर्ना गर्नुपरेको थियो भने ४० प्रतिशत बिरामी ५ वर्षमुनिका बालबालिका रहेका छन् ।

डब्लुएचओ युरोपका क्षेत्रीय निर्देशक हान्स क्लुज ले भने, "दादुरा फेरि फैलिएको छ, र खोपको उच्च दर बिना यसको प्रकोपबाट जोगिन सकिन्न। यो एक गम्भीर चेतावनी हो ।"

उनले खोप नलगाएका समुदायलाई प्राथमिकतामा राखेर तत्काल खोप अभियानलाई तीव्र बनाउनुपर्नेमा जोड दिएका छन् । उनका अनुसार सन् २०२३ मा करिब पाँच लाख बालबालिकाले दादुराको पहिलो खोप मात्रा नपाएका थिए ।

दादुरा कस्तो रोग हो?
दादुरा अत्यन्तै सङ्क्रामक रोग हो जुन संक्रमित व्यक्तिको हावा सासफेर्ने माध्यमबाट फैलिन्छ । संक्रमित व्यक्ति बाहिरिएको दुई घण्टासम्म पनि उक्त क्षेत्रको हावामा भाइरस जीवित रहन सक्छ ।

यसका मुख्य लक्षणहरूमा ज्वरो, रुघाखोकी, र शरीरमा रातो दाना देखिनु पर्दछन्। गम्भीर अवस्थामा यसले निमोनिया, मस्तिष्कको सूजन र मृत्यु समेत गराउन सक्छ ।

सन् १९९७ मा युरोपमा दुई लाख १६ हजार दादुरा संक्रमित फेला परेका थिए। त्यसपछिका वर्षहरूमा खोप अभियानका कारण संक्रमणदर घट्दै सन् २०१६ मा जम्मा ४,४४० मा सीमित भएको थियो। तर हाल पुनः तीव्र गतिमा वृद्धि भएसँगै सार्वजनिक स्वास्थ्य जोखिम बढेको डब्लुएचओको चेतावनी छ ।