काठमाडौँ – सरकारले भोलि आइतबारदेखि तीन दिनका लागि विद्यालय बन्द गर्न आग्रह गरेको छ। कार्यवाहक प्रधानमन्त्री प्रकाशमान सिंहको अध्यक्षतामा शनिबार बसेको विपद्सम्बन्धी आकस्मिक बैठकले बाढी, पहिरो, र अविरल वर्षाका कारण विद्यालय, विश्वविद्यालय र विद्यार्थीहरू प्रभावित भएकाले यो निर्णय लिएको हो।

शिक्षा, विज्ञान तथा प्रविधि मन्त्रालयका प्रवक्ता लक्ष्मीप्रसाद भट्टराईले जारी गरेको विज्ञप्तिमा देशभरका शैक्षिक भवनहरूमा क्षति पुगेको, विद्यार्थी र अभिभावकहरू बाढी र पहिरोको चपेटामा परेका, तथा यातायात अवरुद्ध भएकोले विद्यालयहरू तीन दिनका लागि बन्द गर्न अनुरोध गरिएको छ।

साथै, सरकार, गैरसरकारी संस्था, र नागरिक समाजलाई संयमता अपनाएर विपद् व्यवस्थापनमा समन्वयात्मक रूपमा काम गर्न अपिल गरिएको छ। मन्त्रालयले विश्वविद्यालय अनुदान आयोगलाई भौतिक, शैक्षिक र मानवीय क्षतिको विवरण यथाशीघ्र संकलन गरी पठाउन निर्देशन दिएको छ।

उपत्यकासहित देशका विभिन्न भागमा जारी भारी वर्षाले जनजीवन प्रभावित भएको हुँदा यो निर्णय लिइएको हो।