मकवानपुर – इन्द्रसरोवर गाउँपालिका–३ स्थित एन्फा सिस्नेरी क्याम्पमा अध्ययनरत ६ जना विद्यार्थीको पहिरोमा पुरिएर मृत्यु भएको छ। जिल्ला प्रहरी कार्यालय मकवानपुरका अनुसार, उनीहरूको शव पहिरोले पुरिएको अवस्थामा भेटिएको हो। मृतक विद्यार्थीहरूको शव काठमाडौंस्थित शिक्षण अस्पतालमा पठाइएको छ।

घटना शनिबार बिहान कुलेखानी जलविद्युत आयोजनाको इन्द्र सरोवर जलाशय भरिएपछि जलाशयको ढोका खोलिएपछि भएको हो। त्यसपछि, विद्यालयको छात्रावासमा रहेका विद्यार्थीहरूलाई सुरक्षित स्थानतर्फ सार्न खोज्दा उनीहरू पहिरोमा फसेका थिए। मकवानपुरका प्रमुख जिल्ला अधिकारी तीर्थराज चिलुवालका अनुसार, तत्कालै उद्धार टोली परिचालन गरियो, तर ६ जना विद्यार्थीलाई जोगाउन सकिएन।

एन्फा एकेडेमीमा बन्द प्रशिक्षणमा रहेका अन्य ३४ विद्यार्थी भने सुरक्षित रहेका छन्। उनीहरूलाई नेपाली सेनाको हेलिकप्टर मार्फत काठमाडौं लैजाने तयारी भइरहेको छ।

वल्सलादेवी माविमा सञ्चालित यस एकेडेमीमा ४० जना बालकहरू अध्ययनरत थिए, जहाँ उनीहरू खेलकुद प्रशिक्षणसँगै अध्ययन गरिरहेका थिए। घटना पछि स्थानीय प्रशासन, प्रहरी र नेपाली सेनाले संयुक्त रूपमा उद्धार कार्य सञ्चालन गरेका थिए।