भूमध्यसागर पार गर्दै गरेको एक आप्रवासी डुङ्गा दुर्घटनामा परी ६ जनाको मृत्यु भएको छ भने ४० जना अझै बेपत्ता रहेका छन् । संयुक्त राष्ट्रसङ्घको शरणार्थी सम्बन्धी निकाय युएनएचसिआरका अनुसार सोमबार ट्युनिसियाबाट ५६ जना आप्रवासी लिएर निस्केको डुङ्गा इटालीको लामपेडुसा टापु नजिकै डुबेको हो ।

युएनएचसिआर इटालीकी प्रतिनिधि चियारा कार्डोलेट्टीले एक्समा लेख्दै भनिन्, "डुङ्गा समुद्रमा केही घण्टा यात्रा गरेपछि बिग्रन थाल्यो र पानी भर्न थाल्यो। अहिले ६ वटा शव निकालिएको छ र ४० जना अझै हराइरहेका छन् ।"

इटालीका तटरक्षक र वित्तीय प्रहरीले लाम्पिओन टापु नजिकै १० जनालाई सकुशल उद्धार गरेको इटालियन मिडियाले जनाएका छन् । उद्धार गरिएकाहरूले डुङ्गामा ५६ जना सवार रहेको जानकारी दिएका छन्। हालसम्म भेटिएका सबै शव पुरुषको रहेको बताइएको छ ।

एजिआई समाचार एजेन्सीका अनुसार जीवित बच्न सफल केहीले हराएका आप्रवासीहरू समुद्रमा खसेको बताएका छन् । डुबेको डुङ्गामा सवार अधिकांश आप्रवासीहरू आइभोरी कोस्ट, माली, गाम्बिया र क्यामरुनका नागरिक थिए ।

यसैबीच, ट्युनिसियाको स्फ्याक्सबाट छुट्टै समूहमा रहेका ४० जना आप्रवासी धातुको डुङ्गामा लामपेडुसा टापुमा अवतरण गरेका छन् । मङ्गलबार मात्रै लामपेडुसामा पाँच वटा डुङ्गाबाट २१३ जना आप्रवासी पुगेका छन्, जसपछि स्थानीय स्वागत केन्द्रमा रहेका आप्रवासीहरूको संख्या २३० पुगेको छ ।

इटालीको गृह मन्त्रालयका अनुसार सन् २०२५ को सुरुयता हालसम्म ८,७४३ आप्रवासी समुद्र पार गरेर इटाली आइपुगेका छन्, जुन संख्या अघिल्लो वर्षको सोही अवधिको तुलनामा केही बढी हो।