देशका विभिन्न स्थानमा भएको आगलागीबाट करोडौं रुपैयाँ बराबरको धनमाल जलेर नष्ट भएको छ ।

पोखरामा आईटी पसलमा आगलागी
कास्कीको पोखरा महानगरपालिका-९ न्यूरोडस्थित रमेश शर्मा लुहारको शर्मा आईटी हब पसलमा शुक्रबार बेलुकी आगलागी हुँदा ठूलो क्षति पुगेको छ । आगलागीबाट कम्प्युटर, ल्यापटप, प्रिन्टर, इनभर्टर, ब्याट्रीलगायतका सरसामान जलेर करिब १ करोड रुपैयाँ बराबरको क्षति भएको अनुमान गरिएको छ । आगो फैलिएर छेउमै रहेको हेमन्त सिंहको श्यामा श्याम ट्रेडर्स मा समेत क्षति पुगेको छ, जहाँ सोलार र ब्याट्री जलेर नष्ट भएका छन् ।

तेह्रथुममा आगलागीबाट घर जलेर नष्ट
तेह्रथुमको फेदाप गाउँपालिका-५ नामिन्ताका ५९ वर्षीय राम बहादुर लिम्बुको घरमा शुक्रबार दिउँसो आगलागी हुँदा घर पूर्ण रूपमा जलेर करिब ५ लाख रुपैयाँ बराबरको धनमाल नष्ट भएको छ ।

भक्तपुरमा डेरीमा आगलागी
भक्तपुरको मध्यपुर ठिमी नगरपालिका-४ चारदोबाटोस्थित चण्डेश्वरी दूध डेरी मा विद्युत सर्ट भएर गए राति आगलागी भएको छ । डेरी सञ्चालक काभ्रे बनेपा नगरपालिका-२ का होमनाथ घिमिरे रहेको बुझिएको छ । आगलागीबाट भएको क्षतिको विवरण हालसम्म खुल्न सकेको छैन । स्थानीय बासिन्दा, प्रहरी र दमकलको सहायतामा आगलागी नियन्त्रणमा लिइएको छ।