काठमाडौं – प्रदर्शनरत फिल्म '१२ गाउँ' को नयाँ गीत ‘यो मनले’ सार्वजनिक गरिएको छ। दसैं फूलपातीको अवसर पारेर असोज २४ गतेबाट रिलिज भएको यो फिल्मको गीत रिलिजको हप्ता दिनपछि युट्युबमा सार्वजनिक गरिएको हो। यस गीतले दर्शकहरूको सकारात्मक प्रतिक्रिया पाइरहेको छ। बुढासुब्बा डिजिटलको युटुबमा राखेको ८ घण्टामा करिब २ लाख जनाले हेरेका छन् भने बीस हजार लाईक पुगेको छ । 

रोमान्टिक शैलीको यो गीतमा अर्जुन पोखरेलले संगीत दिएका छन् भने मुक्त उदासले गीतको शब्द लेखेका छन्। शाहिद माल्या र सञ्जीवनीको आवाजमा सजिएको यस गीतले प्रेम भावनालाई प्रस्तुत गरेको छ। भिडियोमा अभिनेता विराज भट्ट र डेब्यु अभिनेत्री न्यान्सी खड्का फिचर्ड छन्, जसले आफ्नो आकर्षक प्रस्तुतीले दर्शकहरूलाई लोभ्याइरहेका छन्।

फिल्म ‘१२ गाउँ’ बाट विराज भट्टका छोरा समीर भट्टले पनि आफ्नो फिल्मी करियरको सुरुवात गरेका छन्। रिलिज भएयता देशभरका हलमा फिल्मले आक्रामक व्यापार गरिरहेको छ। चलचित्रको निर्देशन स्वयं विराज भट्टले गरेका छन्, जसले नेपाली फिल्म क्षेत्रका दर्शकहरूलाई रोमाञ्चक कथावस्तु र उत्कृष्ट प्रस्तुतीमार्फत मनोरञ्जन दिन प्रयास गरेका छन्।