देशभरका विभिन्न स्थानमा शुक्रबार र शनिबार भएका छुट्टाछुट्टै सवारी दुर्घटनामा ६ जनाको मृत्यु भएको छ भने केही घाइते भएका छन् ।

अछामको साँफेबगर नगरपालिका-७ रिडिकोटस्थित सडकमा सु.प.प्र.०१००१ ह ६४२३ नम्बरको अटोको ठक्करबाट ५५ वर्षीया जनक शाहको मृत्यु भएको छ। ठक्करबाट गम्भीर घाइते भएकी शाहको उपचारको क्रममा बयलपाटा स्थित न्याय हेल्थ अस्पतालमा मृत्यु भएको हो ।

त्यसैगरी, इलामको रोङ गाउँपालिका-३ हाँसपोखरीमा इलामबाट झापातर्फ जाँदै गरेको को.१ ख ६४६२ नम्बरको टिपरले मोटरसाइकललाई ठक्कर दिँदा मोटरसाइकल चालक ४० वर्षीय दिर्घ राई र उनका ७० वर्षीय बुवा पन राईको ज्यान गएको छ । दुवै जनाको बिएण्डसी अस्पताल झापामा उपचारको क्रममा मृत्यु भएको हो । दुर्घटनापछि टिपर चालकलाई प्रहरीले नियन्त्रणमा लिएको छ ।

रूपन्देहीको सैनामैना नगरपालिका-१० कोटियाथानस्थित सडकमा लु.३ त ९८६४ नम्बरको ट्याक्टर र लु.६२ प ३०७९ नम्बरको मोटरसाइकल एकआपसमा ठोकिँदा मोटरसाइकलमा सवार पाल्पा रैनादेवी छहरा गाउँपालिका-७ निवासी २५ वर्षीय थमन गाहा र निराज रास्कोटीको मृत्यु भएको छ। गम्भीर घाइते भएका उनीहरूलाई लुम्बिनी प्रादेशिक अस्पताल बुटवल लगिए पनि उपचारका क्रममा ज्यान गएको हो ।

यस्तै, मोरङको उर्लाबारी नगरपालिका-७ मा शनिबार बिहान दमकबाट उर्लाबारीतर्फ गइरहेको को.१ त ६७८८ नम्बरको ट्याक्टरले मोटरसाइकललाई ठक्कर दिँदा ६५ वर्षीय तारानरायण श्रेष्ठको मृत्यु भएको छ । दुर्घटनामा गम्भीर घाइते श्रेष्ठको अरनिको अस्पताल उर्लाबारीमा उपचारको क्रममा निधन भएको हो ।